Rússar viðurkenna Abbas sem leiðtoga

„Við styðjum þig eindregið sem lögmætan leiðtoga Palestínumanna", tilkynnti Sergei Lavrov, utanríkisráðherra Rússlands, Mahmoud Abbas, forseta Palestínu, á blaðamannafundi í Moskvu í gær.

Þetta er helsta stuðningsyfirlýsing rússneskra yfirvalda við Abbas frá því hann batt enda á þjóðstjórn Hamas-samtakanna og Fatah-hreyfingarinnar í síðasta mánuði, í kjölfar valdatöku Hamas-hreyfingarinnar á Gaza-svæðinu í júní.

Nú ríkja í raun tvenn stjórnvöld yfir Palestínumönnum; Hamas á Gaza-svæðinu og Fatah á Vesturbakkanum.

Heimsókn forsetans til Rússlands er liður í ákalli Fatah-hreyfingarinnar eftir stuðningi alþjóðasamfélagsins, og áframhald á valdabaráttu hennar við Hamas-hreyfinguna.

„Ég er viss um að fundur þinn með Pútín forseta á morgun mun hjálpa til við að leggja línurnar um samstarf [...] sem og við þróun í friðarátt í Mið-Austurlöndum," sagði ráðherrann jafnframt.

Rússland bætist þar með í hóp fjölmargra þjóða sem hafa veitt Fatah-hreyfingunni stuðning sinn en sniðgengið Hamas-hreyfinguna.

Hamas var sigurvegari lýðræðislegra kosninga í Palestínu í fyrra, en Ísraelsmenn neita að eiga við samtökin og vísa til hryðjuverkaferils þeirra.

Ísraelsmenn og Vesturveldin brugðust ókvæða við í fyrra þegar Rússar buðu leiðtogum Hamas til viðræðna í Moskvu. Voru viðræðurnar álitnar tilraun Rússa til að viðhalda mikilvægi sínu í Mið-Austurlöndum.

Talsmaður Hamas-samtakanna gerði lítið úr mikilvægi yfirlýsingar rússneska ráðherrans í gær og sagði samtökin einnig telja Abbas lögmætan leiðtoga Palestínu. „Við vefengjum ekki lögmæti forsetans og köllum hann enn þá forseta," sagði Sami Abu Zuhri í gær. Hann fagnaði öllum íhlutunum Rússa sem gætu orðið í átt til sátta en gagnrýndi aftur Abbas forseta fyrir að taka ekki skilyrðislaust þátt í samningaviðræðum.