Eggert: Við verðum að byggja nýjan leikvang

Eggert Magnússon segir að West Ham verði að byggja nýjan knattspyrnuleikvang ef félagið ætli sér að verða rótgróinn klúbbur og eitt af sex stærstu félögunum á Englandi. Hann segir jafnframt að Alan Curbishley stjóri verði ekki látinn selja leikmenn þó liðið falli í 1. deilidina í vor.

"Við ætlum að tjalda öllu til að koma West Ham á kortið sem einu af sex stærstu félögum á Englandi og áætlun liggur fyrir um þá hluti sem við ætlum okkur að gera á viðskiptasviðinu. Við erum að skoða möguleika á því að flytja heimavöll liðsins til að geta stækkað stuðningsmannahópinn og boðið upp á fyrsta flokks aðstöðu," sagði Eggert en Ken Livingstone borgarstjóri í London sagðist nýverið hafa mikinn áhuga á að aðstoða West Ham við að tryggja bjarta framtíð félagsins.

West Ham er í bullandi fallbaráttu í ensku úrvalsdeildinni sem stendur, en Eggert ætlar ekki að gera stórar breytingar þó liðið falli í 1. deildina. "Við ætlum að standa við það sem við lofuðum Alan Curbishley á leikmannamarkaðnum og við munum ekki endilega þurfa að selja leikmenn þó liðið falli. Við erum ef til vill með of stóran hóp til að spila í fyrstu deild, en ég á ekki von á útsölu," sagði Eggert í samtali við ESPN.