Spánverjar jöfnuðu í lokin

Fyrirfram hefði jafntefli gegn Spánverjum verið talin frábær úrslit fyrir íslenska landsliðið. En miðað við þróun leiksins í kvöld er svekkjandi að hafa ekki tekið öll stigin. Leikur Íslands og Spánar á Laugardalsvelli endaði með jafntefli 1-1.

Það var góð stemning á leiknum þrátt fyrir mikla rigningu. Íslenska liðið var mjög líflegt í byrjun leiks. Spánverjar urðu fyrir miklu áfalli á tuttugustu mínútu þegar miðjumaðurinn Xabi Alonso fékk að líta rauða spjaldið. Hann virtist hafa sparkað í Arnar Þór Viðarsson þegar boltinn var víðs fjarri en aðstoðardómarinn sá það.

Spánverjar léku því einum manni færri í um sjötíu mínútur. Strax eftir rauða spjaldið munaði minnstu að Ísland tæki forystuna, Jóhannes Karl Guðjónsson komst í gætt færi en boltinn fór hárfínt framhjá. Fernando Torres átti gott skot hinumegin en Árni Gautur Arason varði vel.

Á 40. mínútu tók Ísland forystu í leiknum þegar Emil Hallfreðsson náði að skora með flottum skalla eftir frábæra sókn. Jóhannes átti fyrirgjöf frá hægri og Emil kláraði færið með miklum stæl. Íslendingar með forystuna þegar liðin héldu til búningsherbergja.

Íslenska liðið sýndi frábæra baráttu og varnarleikur liðsins var mjög góður. Spánverjar voru mun meira með knöttinn í seinni hálfleiknum og sókn þeirra þyngdist hægt og rólega. Þeir fengu þó mjög lítið af opnum færum og virtist vera komið ákveðin örvænting í þá.

Varamaðurinn Andres Iniesta jafnaði í 1-1 fjórum mínútum fyrir leikslok. Iniesta skoraði eina markið þegar Spánn vann Ísland á heimavelli sínum fyrr á árinu og hann var aftur á ferðinni í kvöld. Hann datt einhvernveginn innfyrir vörnina, komst einn á móti Árna í markinu og skoraði.

Það munaði ekki miklu að Íslendingar næðu að taka öll stigin í lokin þegar Emil átti stórhættulega aukaspyrnu í teiginn en enginn Íslendingur náði að komast í knöttinn. Úrslitin jafntefli 1-1. Íslenska liðið sýndi mikinn baráttuanda í leiknum í kvöld en voru að vonum svekktir að hafa ekki náð sigri miðað við hvernig komið var.

Undankeppni EM - F riðill

Lettland - Norður Írland 1-0

Svíþjóð - Danmörk 0-0

Ísland - Spánn 1-1

Staðan (Leikir - Stig)

1. Svíþjóð 8 - 19

2. Norður Írland 8 - 16

3. Spánn 8 - 16

4. Danmörk 7 - 11

5. Lettland 7 - 6

6. ísland 8 - 5

7. Liechtenstein 8 - 4