Al-Kaídaforingi handsamaður

Einn æðsti og reynslumesti foringi al-Kaída hefur verið handsamaður og fluttur í fangabúðirnar á Guantanamo-flóa að því er varnarmálaráðuneyti Bandaríkjanna greindi frá í gær.

Abdul al-Hadi al-Iraqi er sagður hafa verið handtekinn í fyrra og haldið í einu af leynifangelsum Leyniþjónustu Bandaríkjanna (CIA) erlendis þangað til nú.

Talið er að al-Iraqi sé meðal annars ábyrgur fyrir árásum á bandarískan herafla í Afganistan og morðtilraunum á forseta Pakistan og ótilgreinda yfirmenn hjá Sameinuðu þjóðunum að sögn talsmanns varnamálaráðuneytisins.