Spáir United titlinum

Norski vængmaðurinn Morten Gamst Pedersen hjá Blackburn segist sannfærður um að Manchester United verji Englandsmeistaratitil sinn á leiktíðinni. United vann 2-0 sigur á Blackburn á sunnudaginn.

„Ef þú réttir Manchester United litla fingurinn þá taka þeir alla höndina. Arsenal er sterkt lið en United er betra. Horfið bara á liðið, það er ótrúlega sterkt," sagði Pedersen en hann lék allan leikinn á sunnudag.

Sir Alex Ferguson hefur sjálfur sagt að núverandi hópur United sé sá sterkasti sem hann hefur haft í sinni stjóratíð.

Þess má geta að Morten Gamst Pedersen hefur oftar en einu sinni verið orðaður við Manchester United.