Steven Gerrard er tábrotinn

Forráðamenn Liverpool hafa staðfest að fyrirliði liðsins, Steven Gerrard, hafi tábrotnað í leiknum gegn Toulouse í gær. Gerrard þurfti að yfirgefa völlinn á 64. mínútu vegna meiðslanna og í læknisskoðun kom í ljós að táin væri brotin. Gerrard mun samt spila gegn Chelsea á sunnudaginn en mun svo hvíla í 2-3 vikur.

„Okkur hefur verið sagt að það sé ekki mikil áhætta að nota Gerrard á sunnudaginn en hann þarf svo að fá hvíld," segir Rafa Benítez, knattspyrnustjóri Liverpool.

„Hann þarf að hvíla í eina eða tvær vikur. Hann mun mæta á æfingar en hann mun ekki geta spilað með enska landsliðinu (gegn Þýskalandi). Ég mun tala við Steve McClaren um þetta og ég er viss um að hann verði skilningsríkur."