Efnavopna-Ali verður hengdur

Ali Hassan al-Majid, sem kallaður er Efnavopna-Ali, var dæmdur til dauða fyrir þjóðarmorð á kúrdum í Írak í morgun. Ali, sem er best þekktur sem frændi Saddams Hussein verður hengdur. Fimm aðrir háttsettir embættismenn Saddams voru einnig ákærðir vegna morðanna sem áttu sér stað árið 1988.

Tveir þeirra, fyrrverandi varnarmálaráðherra Íraks, Sultan Hashim Ahmed og Hussein Rashid al-Tikriti, fyrrverandi yfirmaður írösku lýðveldisvarðsveitanna voru einnig dæmdir til dauða fyrir glæpi gegn mannkyninu.

Þá voru tveir fyrrverandi yfirmenn leyniþjónustunnar og hersins dæmdir í lífstíðarfangelsi en héraðshöfinginn í Nineveh héraði var sýknaður vegna ónógra sönnunargagna.

Eiturgasi var beitt í fjöldamorðunum þar sem um 180 þúsund kúrdar létust.