McClaren nýtur stuðnings

Formaður enska knattspyrnusambandsins, Brian Barwick, segir að Steve McClaren landsliðsþjálfari njóti enn stuðnings sambandsins þrátt fyrir 2-1 tap Englendinga í Rússlandi í gær.

Wayne Rooney kom Englendingum yfir í fyrri hálfleik en Roman Pavluchenko skoraði tvívegis með skömmu millibili í síðari hálfleik og tryggði þar með Rússum sigurinn.

Úrslitin þýða að jafnvel þótt Englendingar vinni Króata í lokaumferð riðilsins gæti það ekki dugað til að komast í úrslitakeppni EM í Austurríki og Sviss á næsta ári.

Englendingar þurfa að treysta á að Rússar misstígi sig gegn annað hvort Ísrael eða Andorra á útivelli eða að Króatar tapi fyrir Makedóníu á útivelli í næsta mánuði.

„Steve nýtur stuðnings okkar en okkar verkefni er að einbeita okkur að leiknum við Króatíu þann 21. nóvember,“ sagði Barwick.

„Það verður mjög stór dagur fyrir okkur þegar Rússar mæta Ísraelum þann 17. nóvember. Við þurfum á því að halda að Ísraelar vinni leikinn og hjálpi okkur að komast áfram.“