Owen og Terry ætla að ná landsleikjunum

Michael Owen og John Terry eru ákveðnir í því að ná landsleikjum Englands í mánuðinum þrátt fyrir meiðsli sín.

Meiðslavandræði enska landsliðsins virðast engan endi ætla að taka en þeir Owen og Terry ætla að gera allt sem í þeirra valdi stendur til að taka þátt í leikjunum mikilvægu.

England mætir Eistlandi og Rússlandi í undankeppni EM 2008 í mánuðinum og þarf helst á sex stigum að halda til að missa ekki af úrslitakeppninni í Austurríki og Sviss á næsta ári.

Terry gekkst undir aðgerð vegna kinnbeinbrots í gær en góðu fréttirnar eru þær að ekki þarf að græða í stálplötu í beinið vegna brotsins og gæti það flýtt fyrir bata hans. Terry er tilbúinn til að spila með grímu í næstu leikjum Chelsea og enska landsliðsins.

Hann verður þó tæpast til fyrir leik Chelsea gegn Valencia í Meistaradeild Evrópu í vikunni.

Owen gekkst undir aðgerð á nára í Þýskalandi á föstudag og hann vill líka spila. Hann skoraði þrjú mörk í síðustu tveimur leikjum landsliðsins.

Steve McClaren, landsliðsþjálfari Englands, gæti þó átt í erfiðleikum með að velja þá í liðið í staðinn fyrir menn sem eru heilir.

„Það er ekki hægt að útiloka neinn á þessum tímapunkti. Það eru enn tvær vikur í leikinn gegn Eistum og ég veit að bæði John og Michael vilja ólmir spila fyrir enska landsliðið. Allir vita hvernig John Terry er. Hann væri tilbúinn að gefa líf sitt fyrir England. Það er einmitt það sem við þurfum nú.“