Gestum Allardyce úthýst á Reebok vellinum

Eiginkona og sonur Sam Allardyce voru á meðal nokkurra gesta hans sem var meinaður aðgangur að forstjóraboxi Reebok vallarins þegar Bolton tók á móti Newcastle, hinu nýja liði Allardyce, um helgina.

Þetta þykir frekari sönnun á því að vinslit hafi orðið á milli Allardyce og Phil Gartside, stjórnarformanns Bolton, þegar Allardyce ákvað að yfirgefa klúbbinn í lok síðustu leiktíðar. Þeir hafa skotið á hvern annan í fjölmiðlum undanfarið og ekki varð breyting á um helgina.

"Stjórnarformaður Bolton hefur sagt ýmsa hluti um mig upp á síðkastið. Ég veit ekki hvers vegna hann er skyndilega orðinn svo gagnrýninn á mín störf," sagði Allardyce þegar hann var spurður um deilu sína við Gartside.

Uppákoman um helgina, þegar konu Allardyce og syni hans var meinaður aðgangur að forstjóraboxinu, þótti að sögn vitna ákaflega pínleg. Þau neyddust í staðinn til að horfa á leikinn með almúganum í áhorfendastæðum aðkomuliða.

En sá hlær best sem síðast hlær. Allardyce og hans menn í Newcastle tóku öll stigin þrjú á Reebok með góðum 1-3 sigri.