Verðlaun fyrir koltvísýringssíun

Breski auðkýfingurinn Sir Richard Branson tilkynnti í gær að hann héti hverjum þeim vísindamanni sem fyndi upp aðferð til að sía gróðurhúsalofttegundir úr andrúmsloftinu 25 milljónum sterlingspunda í verðlaun, andvirði 3,3 milljarða króna.

Branson naut liðsinnis Als Gore, fyrrverandi varaforseta Bandaríkjanna, sem farið hefur mikinn með kvikmynd sinni „Óþægilegur sannleikur“, er hann kynnti verðlaunasamkeppnina í Lundúnum. Markmiðið með henni er að flýta fyrir því að fundin verði upp tækni sem gerir það framkvæmanlegt með forsvaranlegum tilkostnaði að sía og binda koltvísýring úr loftinu.

„Mennirnir sköpuðu vandann og því ættu mennirnir að leysa hann,“ sagði Branson.