Tekjur Man Utd að aukast verulega

Forráðamenn Manchester United spá því að hagnaður félagsins á næstu tveimur árum eigi eftir að rjúka upp í kjölfar þess að hagnaður félagsins jókst um 20 milljónir punda á síðasta fjárhagsári og stóð í 30,8 milljónum punda. Þá á félagið von á vænlegum summum í kassann á næstu mánuðum.

Þetta þykja nokkuð góð tíðindi í ljósi þess að United komst ekki í riðlakeppni Meistaradeildarinnar á síðustu leiktíð í fyrsta sinn í áratug. David Gill, framkvæmdastjóri félagsins, segir að nýr styrktarsamningur við AIG, stækkun leikvallarins og tekjur af nýjum sjónvarpssamningum - muni tryggja að afkoma félagsins á næstu árum muni verða með afbrigðum góð.

Félagið fékk á sínum tíma 12 milljónir punda í veskið í miskabætur þegar Jon Obi Mikel fór til Chelsea, en það bliknar í samanburði við innkomuna sem verður á komandi ári.

Félagið á von á að fá um 18 milljónir punda á ári fyrir styrktarsamninginn við AIG fyrirtækið, sjónvarpstekjur frá úrvalsdeildini verða um 50 milljónir punda, Meistaradeildin ætti að færa félaginu um 20 milljónir og ef svo fer sem horfir, fær félagið um 2 milljónir punda í budduna vegna miðasölu á hvern einasta heimaleik.