Jói Kalli: Engan veginn okkar dagur

„Menn eru náttúrulega mjög svekktir eftir þennan leik. Þetta er alls ekki það sem við lögðum upp með," sagði Jóhannes Karl Guðjónsson eftir 2-4 tap Íslands gegn Lettlandi í dag.

„Við vorum í fínum takti við leikinn þar til þeir jöfnuðu í 1-1. Eftir það virtumst við of opnir. Við náðum ekki að þétta liðið og varnarleikurinn var ekki góður hjá liðinu í heild sinni," sagði Jóhannes.

„Kantmennirnir hjá Lettlandi komu mikið inn í fyrri hálfleiknum. Ég og Brynjar einangruðumst nokkuð vegna þess. Það opnuðust holur á miðjum vellinum sem við hefðum átt að loka. Þeir skoruðu mjög ódýr mörk í ljósi þess hve sterkir við eigum að vera í föstum leikatriðum."

„Það var agalegt að fá fjórða markið á sig strax í byrjun seinni hálfleiksins. Það var hálfgert reiðarslag en við verðum bara að halda áfram. Á köflum lékum við ágætlega og hefðum getað skorað fleiri mörk. Þetta var engan veginn okkar dagur," sagði Jóhannes Karl.