Chelsea landar Alex

Chelsea hefur loksins náð að landa brasilíska varnarmanninum Alex frá PSV Eindhoven. Chelsea hefur lengi reynt að fá leikmanninn og eftir þrjú ár í Hollandi hefur hann loksins fengið atvinnuleyfi í Englandi. Alex hefur staðist læknisskoðun hjá félaginu og hefur skrifað undir þriggja ára samning.

Varnarmaðurinn sterki býst við mikilli baráttu um sæti í byrjunarliðinu en hann er sannfærður um að hann muni standa sig vel í úrvalsdeildinni. „Ég vona að ég muni standa mig vel hjá þessum frábæra klúbbi," sagði Alex við Chelsea TV. „Ég er ánægður með þetta tækifæri sem að Chelsea hefur veitt mér. Ég vonast til að ná að aðlagast fljótlega og Ricardo Carvalho og Jose Mourinho munu hjálpa mér með tungumálið."