Wenger hefur trú á sínum mönnum

Arsene Wenger, knattspyrnustjóri Arsenal, er sannfærður um að lið hans hafi það sem þurfi til að berjast um efsta sætið í ensku úrvalsdeildinni sem hefst á morgun. „Við búum yfir miklum innri styrk. Ég hef það á tilfinningunni að við munum gera góða hluti, sama hvað aðrir segja," sagði Wenger.

Margir búast við því að Arsenal muni eiga í erfiðleikum á komandi tímabili, sérstaklega eftir að liðið seldi Thierry Henry til Barcelona í sumar. Wenger viðurkennir að það verði ekki auðvelt að fylla upp í skarðið sem Henry skildi eftir sig.

„Hann skoraði fleiri mörk fyrir Arsenal heldur en nokkur annar hefur gert í sögu félagsins þannig að við munum sakna hans, en við munum yfirstíga það. Við ætlum að berjast við Manchester United og Chelsea og erum ekki hræddir við það."