Allardyce ætlar að vinna sína gömlu lærisveina á morgun

Sam Allardyce, knattspyrnustjóri Newcastle, segir að uppbygging liðsins muni taka tíma, en hann vill að liðið vinni fyrsta deildarleik sinn á morgun gegn Bolton. Allardyce kom einmitt til Newcastle í sumar frá Bolton, en þar hafði hann verið við stjórnvölinn í sjö og hálft ár.

„Það myndi verða frábær byrjun á tímabilinu að sigra Bolton á útivelli," sagði Allardyce. „Ég þarf að ná góðum úrslitum strax svo að ég verði ekki fyrir gagnrýni eins og fyrrverandi stjórar liðsins."

Mikil meiðslavandræði eru í herbúðum Newcastle en Shay Given, Michael Owen, Damien Duff, Joey Barton, Emre og Celestine Babayaro eru allir meiddir. Samt sem áður eru David Rozehnal, Geremi, Mark Viduka og Alan Smith tilbúnir til að spila sinn fyrsta alvöru leik fyrir félagið.