Joey Barton: Ég er bara mannlegur

Joey Barton, miðjumaður Newcastle, viðurkennir að hann hafi gert mörg mistök á ferlinum en hann vill að fólk viti að hann er góður strákur. „Ég er enginn pörupiltur," sagði Barton. „Fólk sem þekkir mig, fólk sem ég virði, veit hvernig persóna ég er." Eins og fram hefur komið gæti Barton átt allt að fimm ára fangelsi yfir höfði sér fyrir að berja fyrrverandi liðsfélaga sinn á æfingu.

Barton gekk til liðs við Newcastle í sumar frá Manchester City fyrir 5,8 milljónir punda, en mun sennilega ekki spila fyrr en í september vegna meiðsla.

„Ég er bara mannlegur og ég hef gert mistök - heimskuleg mistök," bætir Barton við. „Ég hef aldrei gengist undan því að ég hafi verið til vandræða. Ég tek slæmar ákvarðanir og ég tek góðar ákvarðanir eins og allir aðrir. Ég er ekki eitthvað ofurvélmenni út af því að ég er knattspyrnumaður. Líf mitt er mikið í sviðsljósinu en fólk fær aðeins að vita af því slæma sem ég geri og það sér ekki hver ég raunverulega er. Ég reyni að lifa góðu lífi og vera góður maður."

Joey Barton er þó ekki svarti sauðurinn í sinni fjölskyldu því að hálfbróðir hans, Michael Barton, afplánar nú 17 ára dóm fyrir aðild sína að morði. Michael og frændi hans myrtu ungan blökkumann árið 2005 og var ástæðan talin vera kynþáttafordómar. Frændurnir flúðu til Hollands eftir morðið og þá reyndi Joey Barton ítrekað að ná í Michael til að reyna að fá hann til að gefa sig fram.