Tevez er löglegur með United

Sky Sports greinir nú frá því að félagaskipti Carlos Tevez hafi loksins verið samþykkt af enska knattspyrnusambandinu. Hann er því löglegur með Manchester United gegn Reading um helgina.

Jafnvel var búist við því að málið yrði ekki klárað fyrr en eftir helgi og koma þessi tíðindi því nokkuð á óvart.

Mál Tevez er eitt það flóknasta sem rekið hefur á fjörur knattspyrnusambandsins í áraraðir vegna hins flókna eignafyrirkomulags á leikmanninum.

Evrópska knattspyrnusambandið hyggst bregðast við málinu og koma í veg fyrir að það endurtaki sig með því að skerpa reglur um eignarhald á knattspyrnumönnum.