Moskítóflugan ekki til sölu

Coventry hefur gefið það út að Maltverjinn Michael Mifsud sé ekki til sölu eins og stendur.

Mifsud eða Moskítóflugan eins og hann er kallaður, hefur slegið í gegn á sínu fyrsta tímabili hjá Coventry og skoraði til að mynda bæði mörk liðsins í 2-0 sigri á Manchester United í deildabikarkeppninni.

Hefur hann verið orðaður við lið í úrvalsdeildinni fyrir 1,5 milljónir punda.

„Enginn okkar leikmanna er til sölu af því að við erum að reyna að byggja upp lið,“ sagði Tim Flowers, aðstoðarknattspyrnustjóri Coventry.

„Við ætlum ekki að selja leikmenn eftir að hafa leitað af nýjum leikmönnum allt sumarið. Ef eitthvað er viljum við bæta leikmannahópinn okkar.“