Jólagjafir fyrir fimm milljarða handa starfsfólki í Danmörku

Dönsk fyrirtæki eyða yfir fimm milljörðum í jólagjafir handa starfsmönnum sínum og hver gjöf kostar að meðatali 4.300 krónur. Þetta sýna niðurstöður danskrar rannsóknar sem vitnað er til í fréttabréfi Samtaka verslunar og þjónustu.

Um 96 prósent danskra fyrirtækja gáfu starfsmönnum jólagjafir um þessi jól og er það aukning um heil 12 prósent frá því í fyrra eftir því sem segir í fréttabréfinu. Tæplega 60 prósent starfsmanna fengu gjöf sem var yfir 5.000 króna virði.

Ekki er þó víst að allir starfsmenn hafi glaðst yfir gjöfunum því samkvæmt SVÞ þurfa þeir sem fengu jólagjöf sem kostar meira en 6.200 krónur að borga skatta af gjöfinni og þurfa þeir sjálfir að sjá til þess að telja gjöfina fram til skatts.