Neita ásökunum um linkind

Ráðamenn í Pakistan harðneituðu fyrir helgina ásökunum frá John Negroponte, yfirmanni bandarísku leyniþjónustunnar, um að hryðjuverkamenn frá al-Kaída hafi fundið sér griðastað í Pakistan þar sem þeir geti safnað liði og búið sig undir frekari aðgerðir.

„Pakistan hefur gert meira en nokkurt annað ríki til þess að brjóta al-Kaída á bak aftur,“ sagði Tasnim Aslam, talsmaður utanríkisráðuneytis Pakistans.

Einnig sagði hann að búi Bandaríkjamenn yfir upplýsingum um staðsetningu al-Kaída-manna í Pakistan, þá ættu þeir að deila þeim upplýsingum með pakistönskum ráðamönnum.