Ferguson reiðubúinn að bíða í ár eftir Tevez

Sir Alex Ferguson, framkvæmdastjóri Manchester United, segist vera tilbúinn að bíða í allt að ár eftir að fá Argentínumanninn Carlos Tevez frá West Ham. United þarf að klára kaupin á Tevez fyrir 31. ágúst ef þeir ætla að nota hann fyrir áramót, en kaupin stranda á Kia Joorabchian, umboðsmanni Tevez.

En Ferguson er ákveðinn í að fá leikmanninn til sín og er reiðubúinn til að bíða fram í janúar eða jafnvel til næsta sumars. „Ég gæti trúað því að við fáum hann áður en glugginn lokast. En ef ekki, munum við samt bíða eftir honum. Við höfuð náð svo langt, það er engin ástæða til að hætta," sagði Ferguson.

Ferguson er þó ákveðinn í að fá nýjan framherja áður en glugginn lokast og talið er að hann muni beina augum sínum að Nicolas Anelka hjá Bolton. Anelka er með ákvæði í samning sínum sem segir að hann geti farið frá Bolton ef að 10,6 milljón punda boð berst í hann.