Ljungberg búinn að skrifa undir hjá West Ham

Sænski miðjumaðurinn Freddie Ljungberg hefur samþykkt að ganga til liðs við West Ham frá Arsenal. Leikmaðurinn, sem skrifaði undir fjögurra ára samning við West Ham, er talinn kosta félagið í kringum 3 milljónir punda. Ljungberg spilaði 325 leiki fyrir Arsenal og skoraði 72 mörk síðan hann kom til liðsins árið 1998 frá Halmstad.

„Þegar ég skrifaði undir síðasta samning minn við Arsenal fyrir tveimur árum var mikið rætt um framtíð klúbbsins. Við ætluðum að byggja nýjan völl og halda okkur á toppnum á Englandi og gera góða hluti í Evrópu. Mér finnst það ekki vera að gerast. Mér finnst eins og allir leikmenn ósigraða Arsenal liðsins frá tímabilinu 2003/04 séu farnir," sagði Ljungberg. "Ég vildi koma til West Ham vegna þess að þeir eru að gera góða hluti. (Eggert) Magnusson er ein helsta ástæðan fyrir því að ég vildi koma, hann hefur metnað til að koma liðinu á toppinn."

Ljungberg er fimmti leikmaðurinn til að ganga til liðs við West Ham í sumar, en áður höfðu Julien Faubert, Scott Parker, Craig Bellamy og Richard Wright gengið til liðs við félagið.