Shevchenko ekki í góðu formi

Úkraínski sóknarmaðurinn Andriy Shevchenko hjá Chelsea er ekki í nægilega góðu formi til að spila heilan leik. Þetta segir Oleg Blokhin, landsliðsþjálfari Úkraínu, en hann kennir um mikilli bekkjarsetu Shevchenko hjá enska stórliðinu.

„Ég er ekki alveg viss um að Shevchenko geti spilað þennan leik, það er allavega ljóst að hann mun ekki geta spilað allan leikinn," sagði Blokhin en Úkraína mætir Úsbekistan í æfingaleik á morgun.

Shevchenko hefur verið langt frá því að standa undir væntingum síðan hann var keyptur fyrir háar fjárhæðir til Chelsea.

Úkraína er í B-riðli í undankeppni Evrópumótsins en liðið mun í næsta mánuði leika gegn Ítalíu sem er í öðru sæti riðilsins og svo gegn Georgíu sem er í næstneðsta sætinu. Frakkland er í toppsætinu.