Fer Heinze til Spánar?

Manchester United hefur lýst yfir ánægju sinni með ákvörðun stjórnar ensku úrvalsdeildarinnar um að neyða félagið ekki til að selja Gabriel Heinze til Liverpool. Nú er útlit fyrir að þessi 29 ára argentínski vinstri bakvörður fari í spænsku deildina en United hefur víst boðið leikmanninn til Real Madrid og Barcelona.

Það er þó ekki víst hvort spænsku félögin vilji Heinze. Spænsku meistararnir í Real Madrid eru uppteknir við að reyna að krækja í Arjen Robben frá Chelsea og Daniel Alves frá Sevilla. Þá eru Börsungar ánægðir með þá möguleika sem þeir hafa í vinstri bakvarðarstöðuna enda nýbúnir að kaupa Eric Abidal.

Til þessa er Liverpool eina félagið sem hefur opinberlega boðið í Heinze en leikmaðurinn vill ólmur losna frá Old Trafford.