Ekki þörf fyrir Euell hjá Middlesbrough

Jason Euell er sár og svekktur eftir að honum var tjáð að hans væri ekki þörf hjá Middlesbrough og gæti farið að leita sér að nýju liði. Eitt ár er síðan Gareth Southgate, stjóri Middlesbrough, keypti Euell frá Charlton.

„Á undirbúningstímabilinu leit allt vel út og Gareth sagði mér að hann ætlaði ekki bara að nota mig sem sóknarmann heldur einnig á miðjunni. Svo núna, nokkrum vikum seinna, fæ ég að heyra það að ég sé óþarfur og geti farið að leita mér að nýju liði," sagði Euell.

„Mér líður vel hjá Middlesbrough og vill ekki fara. Við erum með ungt lið og þó að ég líti ekki á mig sem gamlan leikmann þá er ég einn af þeim eldri og reynslumeiri," sagði Euell sem er þrítugur.