Ronaldo segir þriggja leikja bann fáránlegt

Cristiano Ronaldo hefur nú tjáð sig um þriggja leikja bannið sem hann fékk fyrir að skalla Richard Hughes, leikmann Portsmouth í síðustu viku. Og það er óhætt að segja að hann sé afar ósáttur.

Alex Ferguson skammaði Ronaldo vegna atviksins og sektaði hann um viku laun. Ferguson sagði að Ronaldo yrði að læra að standast ögranir lakari leikmanna sem vildu koma honum úr jafnvægi.

"Ég læt svona ögranir yfirleitt ekki fara í mig. En allir leikmenn hafa línu sem ekki má fara yfir. Hughes fór yfir línunna þetta kvöld. Þetta var hreinlega fáránlegt. Að ég hafi fengið þriggja leikja bann fyrir þetta er mjög ósanngjarnt," segir Ronaldo í viðtali við The Sun í dag.