Ákveðinn í að halda Jaaskelainen

Sammy Lee, knattspyrnustjóri Bolton, segir að framtíð finnska markvarðarins Jussi Jaaskelainen sé hjá félaginu. Leikmaðurinn hefur verið orðaður við nokkur lið á Englandi en hann hefur ekki enn skrifað undir nýjan samning við Bolton.

Lee segir að Jaaskelainen spili stórt hlutverk í sínum áætlunum. „Við vinnum hörðum höndum og gerum allt sem við getum til að halda honum. Við viljum alls ekki missa okkar bestu leikmenn og Jussi er klárlega í þeim hópi," sagði Lee.

Jaaskelainen er sá leikmaður Bolton sem hefur verið lengst hjá félaginu. Arsenal er meðal þeirra félaga sem talið er hafa áhuga á að fá hann í sínar raðir.