Liverpool á eftir markverði Lens

Liverpool er í viðræðum við franska lið Lens um kaup á markverðinum Charles Itandje, og þar með greiða leið Scott Carson sem vill fara á lánssamning hjá Aston Villa út tímabilið. Liverpool ætlar að reyna að fá hinn 24 ára Itandje áður en liðið leikur við Toulouse í undankeppni Meistaradeildar Evrópu í næstu viku.

Rafael Benítez, knattspyrnustjóri Liverpool er sáttur við að lána Carson annað tímabilið í röð, en hann stóð sig vel á milli stanganna hjá Charlton á síðustu leiktíð. Carson hefur sagt Benítez að hann vilji spila reglulega til að halda sæti sínu í enska landsliðinu.

„Við viljum ekki selja Carson, við erum mjög ánægðir með hann. En hann þarf að spila reglulega til að halda landsliðssæti sínu," sagði Benítez. Carson fengi þó ekki að spila með Aston Villa gegn Liverpool á laugardaginn náist samningar á milli liðanna.