Danir í haldi sjóræningja þurfa að bíða lengi eftir frelsinu

Danska utanríkisráðuneytið segir að áhöfn dansks fraksskips sem rænt var úti fyrir Sómalíu þurfi væntanlega að bíða í allnokkurn tíma eftir frelsinu.

Fimm Danir eru í haldi sjóræningja sem ruddust upp í skipið Danica White á laugardaginn þegar það var statt um 240 sjómílur undan ströndum Sómalíu. Haft er eftir fulltrúa í danska utanríkisráðuneytinu á vef Berlingske Tidende að reynslan sýni að samningaviðræður við sjóræningja taki oft vikur. Ráðuneytið hafi ekki enn náð sambandi við skipið og viti því ekki hvaða kröfur sjóræningjarnir setji fram.