Heiðar skoraði gegn sínum gömlu félögum

Heiðar Helguson nýtti tækifærið vel að vera í byrjunarliði Bolton í kvöld því að það tók hann aðeins 12 mínútur að koma sínu liði yfir. Mark Heiðars dugði þó ekki til sigurs því að Fulham svaraði með tveimur mörkum fyrir leikhlé og þar við sat. Heiðari var svo skipt út af á 72. mínútu fyrir Daniel Braaten.

Heiðar skoraði markið eftir mikil mistök hjá Tony Warner, markverði Fulham. Warner ætlaði að kasta boltanum fram völlinn en missti hann og eftirleikurinn var auðveldur fyrir Heiðar. Bolton hefur tapað báðum leikjum sínum í deildinni.