Arsenal fylgist með viðræðum Klose og Werder Bremen

Forráðamenn Arsenal eru sagðir fylgjast vel með gangi mála í viðræðum Miroslav Klose og Werder Bremen um nýjan samning þýska landsliðsmannsins við félagið. Enn sem komið er hefur viðræðunum þokast hægt áfram og segja nokkur ensku blaðanna í morgun að Arsenal hyggist bjóða fimm milljónir punda í Klose ef samningar náist ekki.

Arsenal munu þó væntanlega fá harða samkeppni frá Bayern Munchen um Klose, fari svo að hann skrifi ekki undir nýjan samning við Bremen. Arsene Wenger, stjóri Arsenal, hefur ekki farið leynt með aðdáun sína á Klose í gegnum tíðina og er talið líklegt að forráðamenn Werder Bremen sé mun áhugasamari á að selja Klose til Englands frekar en að láta hann í hendur helstu keppinautanna í þýsku úrvalsdeildinni. Þá er einnig talið að Tottenham hafi mikinn áhuga á að fá Klose í sínar raðir.