Agbonlahor og O'Neill bestir í nóvember

Aston Villa hirti bæði verðlaun ensku úrvalsdeildarinnar fyrir nóvembermánuð. Martin O'Neill var útnefndur besti knattspyrnustjórinn og Gabriel Agbonlahor besti leikmaðurinn.

Aston Villa vann fjóra leiki í röð í síðasta mánuði og skoraði ellefu mörk. Agbonlahor skoraði til að mynda sigurmark í grannaslag Aston Villa og Birmingham.

Martin O'Neill hefur fimm sinnum unnið þessi verðlaun, þar af tvívegis sem knattspyrnustjóri Aston Villa.

„Þetta er auðvitað mikið gleðiefni,“ sagði O'Neill. „Sérstaklega erum við ánægðir fyrir hönd Gabby sem hefur verið að spila sérstaklega vel. Ég tel það mikilvægt að við viðhöldum þessum stöðuleika, sérstaklega í leikjatörninni í kringum jólin og áramótin.“