McClaren þögull sem gröfin

Steve McClaren gefur engar vísbendingar um hvernig enska landsliðinu verður stillt upp á morgun. England mætir þá Króatíu í gríðarlega mikilvægum leik sem sker úr um hvort enska liðið komist í lokakeppni Evrópumótsins.

McClaren þarf að ákveða hvort David Beckham eigi að halda sínu sæti og hvort Paul Robinson snúi aftur í markið í stað Scott Carson sem lék í æfingaleiknum gegn Austurríki. Beckham var einnig í byrjunarliðinu en gæti misst sæti sitt til Shaun Wright-Phillips.

McClaren mun í kvöld tilkynna leikmönnum byrjunarliðið. „Ég þekki mitt lið og ákvað byrjunarliðið um helgina. Ég mun þó ekki opinbera það strax og ætla ekki að gefa neinar vísbendingar," sagði McClaren.

„Reynsla er auðvitað mikilvæg en ekki bara í byrjunarliðinu heldur líka á bekknum og allt í kringum liðið," sagði McClaren.

Arsene Wenger, hinn franski knattspyrnustjóri Arsenal er á þeirri skoðun að Robinson eigi að vera í markinu og spáir því að England leiki með fimm manna miðju með Beckham innaborðs.