Hermann Hreiðars: Við getum bjargað okkur

Hermann Hreiðarsson segir lið sitt Charlton vel geta bjargað sér frá falli í 1. deildina á Englandi. Liðið virtist dæmt til að falla úr úrvalsdeildinni fyrir áramót, en hefur heldur rétt úr kútnum á síðustu vikum undir stjórn Alan Pardew.

"Við skulum sjá hvernig liðunum í kring um okkur í fallbaráttunni gengur að bjarga sér," sagði Hermann í samtali við breska blaðið Mirror. "Rétt fyrir jól var sem við værum búnir að vera og sumir af stuðningsmönnunum sneru baki við okkur. Nú hafa hinsvegar allir lagst á eitt og okkur finnst við geta sloppið við fall. Hlutirnir hafa alveg snúist við undir stjórn Pardew. Menn eru farnir að vinna saman og hafa trú á því sem þeir eru að gera - og ég held að segja megi að pressan sé frekar á liðunum í kring um okkur."

Charlton er í 17. sæti úrvalsdeildarinnar með fjórum stigum minna en Sheffield United sem er í 16. sætinu. Charlton hefur fengið sjö stig úr síðustu þremur leikjum og mætir mestmegnis liðum úr neðri hluta deildarinnar í þeim leikjum sem eftir eru af deildarkeppninni.