Friður um fyrstu embættisverk

Nýkjörinn forseti Tyrklands, sanntrúaður múslimi sem hefur heitið því að virða aðskilnað ríkis og íslams, fékk á miðvikudag í hendur fyrsta embættisverk sitt: að fara yfir ráðherralista nýrrar ríkisstjórnar.

Uppstokkun í stjórninni varð nauðsynleg ekki síst vegna kjörs Abdullah Gül til forseta, þar sem hann var utanríkisráðherra. Á fimmtudag sat Gül síðan við hlið yfirmanns heraflans, Yasars Büyükanit, við hátíðarhöld hersins í tilefni af 85 ára afmæli sigurs yfir Grikkjum. Büyükanit hafði beitt sér af hörku gegn forsetaframboði Güls.

Gül náði kjöri til forseta í atkvæðagreiðslu á þingi á þriðjudag, að undangengnum mánaðalöngum hörðum átökum milli hins trúarlega sinnaða stjórnarflokks, sem hann var í framboði fyrir, og hinna veraldlega sinnuðu mótherja hans. Forsetaembættið hefur fram til þessa verið mikið vígi veraldarhyggjunnar í tyrkneskum stjórnmálum.

Forsetinn hefur vald til að hafna einstökum ráðherraefnum, en ekki var gert ráð fyrir að Gül gerði neinar athugasemdir við ráherraval samherja síns, Recep Tayyip Erdogan forsætisráðherra. Búist var við að Ali Babacan, sem hefur stýrt aðildarviðræðunum við Evrópusambandið, taki við utanríkisráðherraembættinu.