Gül heitir að virða hin veraldlegu gildi

Sanntrúaður múslimi með rætur í stjórnmálahreyfingu sem vill blanda íslamstrú í stjórnmálin var í gær kjörinn forseti Tyrklands. Kjör hans markar mikinn sigur fyrir hinn trúarlega sinnaða stjórnarflokk, Réttlætis- og þróunarflokkinn (AKP), eftir mánaðalanga togstreitu við veraldarhyggjusinna í hinni rótgrónu stjórnmálaelítu landsins.

Abdullah Gül hlaut 339 atkvæði í þriðju og síðustu atkvæðagreiðslulotunni á tyrkneska þjóðþinginu í Ankara. Er þingforsetinn, Koksal Toptan, tilkynnti þetta braust út mikið lófatak í salnum.

Eftir að hafa svarið embættiseið sem ellefti forseti tyrkneska lýðveldisins bar Gül í ávarpi lof á hið veraldlega stjórnkerfi landsins og hét að hafa hin veraldlegu gildi þess í heiðri.

"Veraldarhyggja " ein af grundvallarreglum lýðveldis okkar " er forsenda fyrir félagslegum friði og er jafnframt frelsandi snið fyrir ólíkan lífsstíl," sagði Gül. "Svo lengi sem ég verð forseti mun ég líta á mig sem fulltrúa allra borgara lýðveldisins jafnt. Ég mun gæta hlutleysis af ítrustu gætni."

Kjör Güls fór fram daginn eftir að yfirmaður tyrkneska heraflans birti afdráttarlausa viðvörun um að veraldlegum gildum lýðveldisins væri ógnað. Herinn hefur steypt fjórum ríkisstjórnum í landinu frá því árið 1960, í nafni þess að standa vörð um þessi gildi. Framboð Güls til forseta fyrr á árinu mætti mikilli andstöðu " meðal annars á milljón manna mótmælafundi " vegna ótta um að hann vildi grafa undan hinum veraldlegu hefðum ríkisins.

Það var ekki síst vegnaforsetakjörskreppunnar í vor sem Recep Tayyip Erdogan boðaði til þingkosninga í sumar, sem lyktaði með öðrum stórsigri flokks hans.

"Þjóð vor hefur horft upp á hegðun þessara aðskilnaðarsinna sem geta ekki sætt sig við einhyggjueðli ríkisins, og miðstöðva hins illa sem með kerfisbundnum hætti reyna að grafa undan veraldlegu eðli tyrkneska lýðveldisins," skrifaði Yasar Büyükanit, yfirmaður heraflans, í orðsendingu sem birt var á vef hersins í fyrradag.

Erdogan forsætisráðherra og náinn samherji Güls fagnaði kjöri hans. Hamingjuóskir bárust einnig frá leiðtogum Evrópusambandsins og víðar að úr heiminum. Sem utanríkisráðherra hefur Gül verið í forystu fyrir undirbúningi Tyrklands að inngöngu í Evrópusambandið.