Mafíumorðalda sem hófst með eggjakasti

Þýska lögreglan gerði húsleit á fleiri tugum heimila í mörgum borgum í Þýskalandi á föstudaginn í tengslum við rannsóknina á morðum á sex Ítölum í Duisburg hinn 15. ágúst. Þýska lögreglan yfirheyrði tugi manna sem voru á heimilunum þar sem leitin var gerð. Lögreglan efndi til rassíunnar eftir að hafa fengið um 380 vísbendingar frá þýskum almenningi.

Lögreglan í Þýskalandi greindi einnig frá því að sexmenningarnir hefðu verið myrtir með tveimur byssum en vildi ekki skýra frá því hvaða gerðar þær voru. Talið er að tveir menn hafi framið morðin og birti þýska lögreglan myndbandsupptöku á netinu þar sem þeir sjást flýja af morðstaðnum.

Talið er að morðin hafi verið hluti af fæðardeilu á milli tveggja hópa í ítölsku Ndrangheta-glæpasamtökunum frá Kalabríu, Pelle-Vottari og Nirta-Strangio.

Sexmenningarnir voru bornir til grafar fyrir helgi. Fimm þeirra voru jarðaðir í San Luca í Kalabríu á Suður-Ítalíu og var ítalska lögreglan með mikinn viðbúnað af ótta við að hefnda yrði leitað. Sá sjötti, hinn átján ára gamli Tommaso Venturi, var jarðsettur nærri Duisburg á föstudaginn. Mennirnir voru skotnir í höfuðið eftir að hafa komið út af pitsustað í miðborg Duisburg þar sem þeir voru að fagna átján ára afmæli Tommaso.

Einn af hinum myrtu er talinn hafa tekið þátt í að myrða Maríu Strangio, eiginkonu leiðtoga Nirta-Strangio-hópsins, Giovanni Nirta, í desember í fyrra. Talið er að sexmenningarnir hafi verið myrtir til að hefna fyrir morðið á Maríu. Þegar fréttaritari ítalska dagblaðsins Corriere della Sera spurði Giovanni fyrr í mánuðinum, á heimili hans í San Luca, hvort hann væri leiðtogi hópsins sagði hann. "Er ég leiðtoginn? Sérðu vopn hér í húsinu mínu? Þið sjáið það sjálfir að húsið mitt er ekki girt af, það þarf ekki að fara í gegnum nein öryggishlið til að komast að því. Ég er bara bóndi sem ræktar jörðina og ver frístundum mínum með börnunum mínum. Frá því í janúar hef ég varla farið út úr húsi því ég hef verið að syrgja konuna mína." Talið er að morðingjar Maríu hafi ætlað að drepa Giovanni í árásinni.

Fimmtán hafa nú þegar látið lífið í fæðardeilunni á milli hópanna tveggja sem hófst árið 1991. Þá fóru tveir ungir menn inn á bar eins leiðtoga hins hópsins í San Luca og köstuðu eggjum. Mennirnir tveir voru drepnir stuttu síðar og hefur verið hefnt á víxl síðan.