Hreifst af metnaði félagsins

Kieron Dyer, nýjasti liðsmaður Íslendingaliðsins West Ham, segist hafa hrifist af gríðarlegum metnaði félagsins og að sá mikli vilji Eggerts Magnússonar og annarra forráðamanna þess um að koma liðinu í fremstu röð hafi ráðið mestu í ákvörðun sinni um að skrifa undir fjögurra ára samning við félagið. Gengið var frá félagsskiptum Dyers frá Newcastle seint á fimmtudagskvöldið en áður hafði litið út fyrir að ekkert yrði úr kaupunum.

„Það hafði áður komið fram að ég vildi fara til London til að komast nær fjölskyldu minni en það sem skiptir ekki síður máli er að West Ham er félag sem ég hef mikla trú á. Félagið hefur sýnt mikinn metnað með því að fá til sín öfluga leikmenn og ég bókstaflega elska þetta hungur sem einkennir staðinn," sagði Dyer.

Sam Allardyce, stjóri Newcastle, segir að vissulega sé missir af Dyer en óskaði honum alls hins besta. Kaupverðið á Dyer er talið vera um sex milljónir punda auk þess sem West Ham þarf að greiða ákveðnar upphæðir þegar Dyer hefur náð ákveðnum leikjafjölda með liðinu.

Hjá West Ham hittir Dyer fyrir fyrrum félaga sinn hjá Newcastle, Lee Bowyer, en mörgum ætti að vera í fersku minni þegar þeir lentu í handalögmálum í miðjum leik fyrir nokkrum árum. Alan Curbishley, stjóri Charlton, hefur ekki áhyggjur af því að slík framkoma endurtaki sig.

„Ég hef talað við báða leikmenn vegna þessa og þeir fullvissa mig um að þetta sé gleymt og grafið. Þeir eru í fínu sambandi í dag og talast reglulega við svo ég sé þetta ekki sem vandamál," sagði Curbishley.