Ástralar geta ekki stytt fangelsisvist Hicks

Ástralar munu ekki fá vald til þess að stytta fangelsisdóm yfir David Hicks sem kallaður hefur verið ástralski talibaninn. Hicks játaði sakir við réttarhöld í Guantanamo-fangelsinu á Kúbu fyrr í vikunni en hann var sakaður um að hafa verið í þjálfunarbúðum Al-Kaída í Afganistan og aðstoðað talibana í stríðinu við Bandaríkjamenn.

Faðir Hicks hefur staðhæft að hann hafi bara játað til að sleppa frá Guantanamo, en þar hefur hann mátt dúsa í fimm ár. Hicks verður framseldur til Ástralíu en sem fyrr segir hafa Ástralar ekki heimild til að stytta fangelsisvist hans.

Hicks var sá fyrsti af um áttatíu sem á að mæta fyrir dóm í Guantanamo samkvæmt nýjum reglum Bandaríkjastjórnar. Mannréttindasamtök hafa fordæmt réttarhöldin, segja þau sýndarmennsku og hvetja til þess að réttað verði yfir þeim fyrir almennum dómstólum í Bandaríkjunum.