Bretar fá leyfi Írana til að hitta 15 sjóliða

Íranar hafa gefið Bretum leyfi til að hitta sjóliðana 15 sem voru handteknir fyrir tæpri viku á Persaflóa.

Utanríkisráðherra Íran sagði einnig að einu konunni sem er í hópnum verði líklega sleppt. Ráðherrann bætti því svo við að málið yrði aðeins leyst ef Bretar viðurkenndu að sjóliðarnir hafi verið í íranskri lögsögu en ekki írakskri eins og Íranar hafa staðfastlega haldið fram.

Í sjónvarpsviðtali sem sýnt var í gær við einn sjóliðanna sagði hann að þeir hefðu verið handteknir vegna þess að þeir hefðu greinilega verið í íranskri landhelgi. Hann sagði alla við góða heilsu og að vel væri komið fram við þau. Það hefur vakið reiði í Bretlandi að sjóliðarnir séu sýndir í sjónvarpi í áróðursskyni.

Breska varnarmálaráðuneytið sagðist í gær hafa undir höndum gögn úr staðsetningatækjum sem sanna að sjóliðarnir hafi verið Íraks-megin í flóanum og handtökurnar því með öllu óréttlætanlegar. Blair forsætisráðherra hafði áður sagt að ef friðsamlegar leiðir dygðu ekki til að fá sjóliðana lausa yrði gripið til annara og harðari aðgerða, sem hann útlistaði þó ekki frekar.

Lausn á þessu pólitíska einvígi milli stjórnvalda í Teheran og í London virðist því enn ekki í sjónmáli.