Pólverjar einangraðir í ESB

Meginmarkmiðið á leiðtogafundi Evrópsambandsins, sem hefst í Brussel í dag, er að ná samkomulagi um að bjarga því sem bjargað verður af hinum strandaða stjórnarskrársáttmála sambandsins. Á þetta leggur þýska stjórnin ofuráherslu, en hún lýkur formennskumisseri sínu í ESB um mánaðamótin.

Angela Merkel, kanslari Þýskalands, bindur ekki síst vonir við að hinn nýi og athafnaþyrsti forseti Frakklands, Nicolas Sarkozy, muni reynast henni öflugur liðsauki í að ná þessu markmiði. Helsta hindrunin í vegi fyrir því að þetta gangi eftir er andstaða ráðamanna í Póllandi, sem gekk í sambandið fyrir þremur árum.

Pólska stjórnin hótar að beita neitunarvaldi gegn áformunum um nýjan og umfangsminni sáttmála í stað stjórnarskrársáttmálans. Pólski forsætisráðherrann, Jaroslaw Kaczynski, hefur gengið svo langt að segja að það væri „vert að deyja" fyrir þá útgáfu af atkvæðavægiskerfi sem Pólverjar leggja til í staðinn fyrir hið svonefnda kerfi „tvöfalds meirihluta" sem samið var um í stjórnarskrársáttmálanum og almenn sátt er um að verði komið í framkvæmd. Pólverjar telja að þeir eigi á hættu að tapa meira vægi í ESB-kerfinu en þeir geta sætt sig við. Ekkert annað aðildarríki hefur lýst stuðningi við pólsku tillöguna.

Djúpstæðir fyrirvarar Breta gegn vissum öðrum þáttum stjórnarskrársáttmálans sem aðrir vilja bjarga yfir í nýjan sáttmála geta líka sett strik í reikninginn. Þetta verður síðasti leiðtogafundurinn sem Tony Blair situr. Hann mun láta af embætti í næstu viku.

Merkel, Sarkozy og aðrir stuðningsmenn nýs sáttmála segja að nauðsynlegt sé að endurvekja kjarnaþætti stjórnarskrársáttmálans - sem strandaði þegar kjósendur í Frakklandi og Hollandi höfnuðu fullgildingu hans fyrir tveimur árum - til þess að Evrópusambandið geti beitt sér með skilvirkum hætti í alþjóðamálum.

Öll aðildarríkin 27 eru sammála um að einhverrar uppfærslu sé þörf á ákvarðanatöku- og stofnanakerfi sambandsins eftir að aðildarríkjum fjölgaði um tólf frá því síðasta slíka uppfærslan var ákveðin árið 2000.