Keypti leikmenn fyrir 5 milljarða án þess að sjá þá spila

Knattspyrnustjóri Manchester City, Sven Göran Eriksson, hefur verið duglegur að kaupa leikmenn undanfarna daga. Hann er búinn að kaupa leikmenn fyrir tæpa 5 milljarða króna og marga þeirra hefur enn hann ekki séð spila. Sven Göran viðurkennir að hann hafi kíkt á myndbandsspólur og séð til leikmanna þar en ekki séð þá í leik.

Á blaðamannafundi í gær mismælti sænski knattspyrnustjórinn sig þegar hann spurði Búlgarann Valeri Bojanov hvers vegna hann hefði valið að koma til Manchester United. Eldrauður í framan tókst honum að leiðrétta sig en mörgum blaðamanninum var skemmt.

Alls hefur Sven Göran keypt 8 leikmenn til Manchester City á þeim skamma tíma sem hann hefur verið við stjórnvölinn. Nú er líklegt að hann bæti þeim níunda við því City er sagt vera að kaupa Ástralann, Marco Bresciano frá Palermo á 3 milljónir punda.