Van Gaal líkir tilboði Middlesbrough við þjórfé

Louis van Gaal, knattspyrnustjóri AZ Alkmaar, hefur engan áhuga á að missa íslenska bakvörðinn Grétar Rafn Steinsson frá félaginu fyrir eitthvað klink, eins og hann orðaði það sjálfur í samtali við enska fjölmiðla í gær. Van Gaal gerði lítið úr nýlegu tilboði Middlesbrough í leikmanninn og líkti því við þjórfé.

„Þetta var ekkert tilboð. Þeir buðu rúmar milljón evrur og fyrir leikmenn eins og Grétar er það eins og hvert annað þjórfé. Það er eitthvað sem borgar fyrir góða þjónustu, ekki fyrir góðan leikmann,“ sagði Van Gaal.

Tilboð Middlesbrogh hljóðaði upp á um 100 milljónir íslenskra króna og í síðustu viku gerði Newcastle enn betur og bauð rúmar 150 milljónir í leikmanninn. Báðum tilboðunum var hafnað samstundis. Talið er að forráðamenn AZ vilji fá að minnsta kosti 400 milljónir fyrir hinn 25 ára gamla Grétar.