Aukinn herafli sendur til Írak

Robert Gates varnarmálaráðherra Bandaríkjanna hefur samþykkt að senda 2.200 herlögreglumenn til viðbótar til Írak til að aðstoða við öryggisáætlunina sem nú er í gangi í Bagdad.

Gates sagði í neðri deild þingsins að þessir 2.200 hermenn væru hrein viðbót við þá 24 þúsund sem brátt færu til Írak, eins og Bush forseti hefur fyrirskipað. Það var yfirhershöfðingi Bandaríkjanna í Írak, David Petraeus sem fór fram á mannaflann.

Gates sagði við þetta tækifæri að það kæmi honum ekki á óvart hve uppreisnarmenn súnnía hafa verið stórtækir í árásum sínum undanfarna daga. Hann sagði að við því hefði verið búist að til skamms tíma mundi ofbelid í landinu aukast á meðan öryggisáætlunin byrjaði að hafa tilætluð áhrif. Þá sagði hann að áætlunin væri þegar farin að lofa mjög góðu.

Öryggisáætlunin felur í sér sókn bandarískra og írakskra hersveita sem leita velta nú við hverjum steini í leit að uppreisnarmönnnum í Bagdad og ólöglegum vopnum.