Pólitísk spenna stigmagnast í Úkraínu

Viktor Júsjenkó, forseti Úkraínu, tilkynnti í gær að hann tæki yfir stjórn hermanna sem heyra undir innanríkisráðuneyti Úkraínu. Innanríkisráðuneytið hafnaði hins vegar fyrirskipun forsetans þar sem hún væri ólögleg að sögn talsmanns ráðuneytisins sem sagði „glæpsamlegt að framfylgja ólöglegum fyrirskipunum".

Innanríkisráðherrann er bandamaður forsætisráðherra Úkraínu, Viktors Janúkovits, sem er höfuðandstæðingur Júsjenskós. Spennan hefur stigmagnast undanfarnar vikur á milli Júsjenkós og Janúkovits, og þessi fyrirskipun Júsjenkós er talin benda til aukins ótta um að til mögulegra átaka komi.

Í yfirlýsingu frá forsetaembættinu segir að fyrirskipunin sé nauðsynleg „til að fyrirbyggja að hermenn innanríkisráðuneytisins séu notaðir í hag pólitískra afla sem ógna þjóðaröryggi Úkraínu".

32.000 hermenn og 220.000 lögreglumenn heyra undir innanríkisráðuneytið en fyrirskipun Júsjenkós nær aðeins til hermannanna sem Oleksandr Kihtenko hershöfðingi, bandamaður Júsjenkós, leiðir.

Mikil spenna hefur verið í Úkraínu frá því að Júsjenkó leysti upp þing 2. apríl síðastliðinn og boðaði til kosninga á þeim grundvelli að Janúkovits væri með ólöglegum hætti að auka við þingmeirihluta sinn í þeim tilgangi að sölsa undir sig völd. Þingmenn hafa hins vegar hundsað fyrirskipun Júsjenkós sem þeir segja brjóta gegn stjórnarskránni.

Spennan magnaðist enn á fimmtudaginn þegar Júsjenkó rak ríkissaksóknara Úkraínu, Svyatoslav Piskun, úr embætti á þeim grundvelli að Piskun, sem er þingmaður úr liði Janúkóvits, geti ekki setið sem ríkissaksóknari meðfram þingmennsku. En óvissa um hvort að sitjandi þing sé löglegt flækir brottreksturinn.

Fyrirskipun Júsjenkós um að leysa upp þing er nú til meðferðar hjá stórnlagadómstóli Úkraínu. Júsjenkó og Janúkovits hafa báðir samþykkt að hlíta úrskurði dómstólsins en málsmeðferð hefur dregist vegna fyrirskipana Júsjenkós um brottrekstur nokkurra dómara dómstólsins, þar á meðal yfirdómarans.