Ronaldo samdi til ársins 2012

Stuðningsmenn Manchester United áttu kannski ekki von á frábær vika yrði enn betri eftir 7-1 sigur á Roma á þriðjudagskvöldið en fréttirnar af nýjum samningi Cristiano Ronaldo sáu þó til þess.

Ronaldo, sem hefur margoft verið orðaður við spænska liðið Real Madrid, skrifaði undir nýjan fimm ára samning sem heldur honum á Old Trafford til ársins 2012.

„Ég er mjög ánægður því það vissu allir að ég vildi vera hér áfram. Mér líður mjög vel hjá Manchester United, ég vil vinna titla og vonandi náum við því á þessu tímabili,“ sagði Ronaldo.

„Þetta eru frábærar fréttir og sýna það og sanna að Cristiano er ánægður hjá okkur og að hann sé í rétta klúbbnum,“ sagði stjórinn Sir Alex Ferguson.

„Hann hefur gott samband við alla hjá félaginu og verður einn af bestu leikmönnum félagsins frá upphafi,“ bætti Sir Alex við. Ferguson telur ennfremur að Ronaldo eigi möguleika að komast í hóp með tveimur bestu knattspyrnumönnum allra tíma, þeirra Pele og Diego Maradona.

Það kættust fleiri við fréttirnar. Ryan Giggs sinnir fyrirliðastörfum Manchester United í fjarveru Gary Neville og spáir Ronaldo miklum frama.

„Það er enginn í heimi sem á möguleika á að velta honum úr sessi sem besta knattspyrnumann heims. Það er einstakt að sjá hvað hann hefur náð miklum stöðugleika þrátt fyrir ungan aldur og þá stöðu sem hann spilar á vellinum. Þetta eru frábærar fréttir,“ sagði Giggs en Ronaldo hefur skoraði 20 mörk í 50 leikjum með United á þessu tímabili. Ronaldo kom 17 ára gamall til Man. Utd sumarið 2003.