Fordæma þjóðaratkvæðagreiðslu

Þjóðaratkvæðagreiðsla fór fram í Egyptalandi í gær um stjórnarskrárbreytingar sem stjórnarandstæðingar hafa fordæmt sem fals og afturför lýðræðisþróunar.

Ríkisstjórn Hosnis Mubarak, forseta Egyptalands, hampar breytingunum sem hluta herferðar fyrir lýðræðislegum umbótum. En stjórnarandstæðingar segja breytingunum aðeins ætlað að festa í sessi stjórn flokks Mubaraks. Benda þeir á ákvæði sem þeir segja munu veikja eftirlit með kosningum og búa í haginn fyrir kosningasvindl. Eitt ákvæðið leyfir tímabundna sviptingu á borgaralegum réttindum. Hægt sé að handtaka fólk án rökstuðnings og leita á heimilum án dómsúrskurðar við rannsóknir á hryðjuverkum.

Margir kjörstaðir stóðu auðir í gær. Er það bæði rakið til þess að stjórnarandstöðuflokkar hvöttu almenning til að sniðganga kosningarnar og þess að aðeins er vika síðan þingið samþykkti breytingarnar. Voru margir óvissir um hvað verið væri að kjósa um.

Kvöldið fyrir atkvæðagreiðsluna hvatti Mubarak landsmenn til þess að kjósa þar sem breytingarnar myndu hvetja til starfsemi stjórnmálaflokka og vernda landið gegn hryðjuverkaógn.

Egypsk mannréttindasamtök sögðust hafa skráð hundruð dæmi um kosningasvindl á kjörstöðum í gær. Anas el-Fiqqi, upplýsingamálaráðherra Egypta, sagði „fullkomið gegnsæi“ hafa einkennt atkvæðagreiðsluna.