Webb dæmir á laugardag

„Bestu dómararnir fá bestu leikina," sagði talsmaður enska knattspyrnusambandsins þegar hann var spurður út í það hvers vegna Howard Webb ætti að dæma leik Arsenal og Manchester United næsta laugardag.

Það er skammt stórra högga á milli hjá Webb en hann dæmdi leik Liverpool og Arsenal síðasta sunnudag. Gagnrýnisraddir hafa verið uppi um að álagið sé of mikið á Webb og þá finnst mörgum skrýtið að hann dæmi hjá sama liðinu tvær helgar í röð.

„Webb er sá sem hefur sýnt bestu frammistöðuna af dómurum deildarinnar og því sjálfsagt að hann fái bestu leikina," sagði talsmaður enska knattspyrnusambandsins.