Vefsíða kaupir fótboltafélag

Vefsíðan MyFootballClub.co.uk hefur tilkynnt um kaup á enska utandeildarliðinu Ebbsfleet United. Þar með hefur verið brotið blað í fótboltaheiminum en í gegnum þessa síðu hefur almenningi verið gefinn kostur á að kaupa hlut í fótboltaliði.

Tuttugu þúsund manns hafa skráð sig á síðunni og hver og einn borgað 35 pund til að taka þátt í yfirtöku á fótboltaliði. Aðstandendur síðunnar ákváðu síðan að það félag yrði Ebbsfleet. Allir þeir sem skráðu sig munu eiga jafnan hlut í félaginu.

Í gegnum vefsíðuna munu síðan þessir tuttugu þúsund eigendur kjósa í lýðræðislegri kosningu um leikskipulag, kaup og sölu á leikmönnum og allar aðrar ákvarðanir sem þarf að taka í rekstri á fótboltafélagi.

„Við lítum á þetta sem stórt tækifæri," sagði Jason Botley, stjórnarformaður Ebbsfleet. „Sá peningur sem við fáum nú aukalega mun hjálpa til að koma félaginu hærra upp."

Gengið verður frá samningum á næstu dögum og mun MyFootballClub.co.uk eignast 51% hlut í félaginu með möguleika á að stækka þann hlut enn frekar í framtíðinni. Eftir yfirtökuna mun sama stjórn verða við lýði hjá félaginu.

Liam Daish var knattspyrnustjóri félagsins en allar ákvarðanir færast nú í hendur notenda MyFootballClub.co.uk. Daish mun þó halda áfram að starfa fyrir félagið en hans starfstitill verður nú yfirþjálfari.

„Þetta er ekki stór breyting fyrir mig. Það sem fram fer á æfingasvæðinu og í búningsklefanum verður enn í mínum höndum. Stuðningsmennirnir munu borga mín laun og fjármagna félagið. Það er því bara jákvætt að þeir fái að ráða hverjir spila leikina," sagði Daish.

Ebbsfleet er í níunda sæti í utandeildinni, sex stigum frá umspilssæti fyrir því að komast í ensku deildarkeppnina.

„Það er mikil áskorun fyrir mig að taka þátt í því að búa til sigursælt lið með aðstoð frá tuttugu þúsund manns," sagði Daish.